(उरण – रायगड उपसंपादक संजय गायकवाड)
पेण येथील लॅबगार्ड कंपनीतील कामगारांसाठी यंदाची दिवाळी खऱ्या अर्थाने गोड ठरली आहे. न्यू मेरीटाईम अँड जनरल कामगार संघटनेच्या माध्यमातून कंपनी व्यवस्थापन आणि संघटनेदरम्यान तिसऱ्या पगारवाढीचा करार करण्यात आला असून, या करारामुळे कामगारांना तब्बल १०,००० रुपयांची पगारवाढ मिळाली आहे.
हा ऐतिहासिक करार १६ ऑक्टोबर रोजी पनवेल येथील संघटनेच्या कार्यालयात पार पडला. विशेष म्हणजे, संघटनेचे अध्यक्ष आणि राष्ट्रीय कामगार नेते महेंद्रशेठ घरत हे सध्या ITF या बहुराष्ट्रीय संघटनेच्या जागतिक परिषदेसाठी ब्राझिल (साऊथ अमेरिका) येथे आहेत. तरीदेखील, कामगारांच्या हिताचा विचार करून त्यांनी आपल्या अनुपस्थितीत संघटनेच्या पदाधिकाऱ्यांना करारावर स्वाक्षरी करण्याचे अधिकार दिले. त्यामुळे कामगारांना मिळणारे फायदे थांबले नाहीत आणि हा करार वेळेत पार पडू शकला.
या करारनाम्यानुसार,
🔹 कामगारांना १०,००० रुपयांची पगारवाढ,
🔹 १२.५% बोनस,
🔹 मेडीक्लेम सुविधा,
🔹 वार्षिक पिकनिक आणि
🔹 रजांमध्ये वाढ यासह अनेक लाभ देण्यात आले आहेत.
सर्वात आनंदाची बाब म्हणजे या पगारवाढीचा फरक आणि बोनसची रक्कम दिवाळीपूर्वीच कामगारांच्या खात्यात जमा करण्यात येणार आहे. त्यामुळे लॅबगार्ड कंपनीतील कामगारांची दिवाळी यंदा अधिक उजळणार आहे.
या कराराच्या प्रसंगी संघटनेचे कार्याध्यक्ष पी.के. रमण, सरचिटणीस वैभव पाटील, व्यवस्थापनातर्फे डायरेक्टर अजय कणेकर, प्रोडक्शन मॅनेजर राहुल जोगत, तसेच कामगार प्रतिनिधी हरेश पाटील, सुरेश दळवी, प्रमोद पाटील, रोहन कडव, प्रदीप धनावडे, सुभाष पाटील आदी उपस्थित होते.
कामगारांमध्ये या करारानंतर उत्साह आणि समाधानाचे वातावरण पसरले असून, महेंद्रशेठ घरत यांच्या नेतृत्वाची पुन्हा एकदा दखल घेत कामगारांनी त्यांच्याप्रती कृतज्ञता व्यक्त केली आहे.
दिवाळीपूर्वी झालेली पगारवाढ म्हणजे लॅबगार्ड कामगारांसाठी आनंदाचा सण — असा सूर संपूर्ण परिसरात उमटत आहे.