पाटसच्या गाव तलावाच्या जागेची तात्काळ मोफत मोजणी करण्याचे तहसीलदारांचे आदेश

नेताजी खराडे ( दौंड तालुका प्रतिनिधी )

पाटस (ता. दौंड) – पाटस गावाचा ऐतिहासिक व सांस्कृतिक वारसा असलेला नाथबाबांचा तलाव (गाव तलाव) अतिक्रमणाच्या विळख्यात सापडल्याच्या तक्रारींवर अखेर प्रशासनाने कारवाईची दिशा धरली आहे. काही प्रभावी व्यक्तींनी तलावाच्या हद्दीत अनधिकृतपणे बांधकामे व अतिक्रमण केल्याच्या आरोपांनंतर सामाजिक कार्यकर्त्यांनी दाखल केलेल्या तक्रारीवर सुनावणी घेत तहसीलदार, दौंड यांनी संबंधित तलावाची तात्काळ मोफत मोजणी करण्याचे आदेश जारी केले आहेत.

तलावाचा इतिहास, पण सध्या धोक्यात अस्तित्व

पाटस गावाचा प्रमुख जलस्रोत आणि गावाची शान म्हणून ओळखला जाणारा हा तलाव आज अतिक्रमणामुळे अस्तित्वाच्या उंबरठ्यावर पोहोचला आहे. चारही बाजूंनी सुरू असलेली बांधकामे, बेकायदेशीर जमिनीचा ताबा आणि स्थानिक पातळीवरील दबावामुळे तलावाचा मूळ परिसर दिवसेंदिवस संकुचित होत चालला आहे.
स्थानिक नागरिकांच्या म्हणण्यानुसार, अनेकांना अतिक्रमण दिसत असूनही, प्रभावशाली मंडळींच्या भीतीमुळे अनेक ग्रामस्थ मौनात आहेत.


सामाजिक कार्यकर्त्यांचा पुढाकार

तलावाचा इतिहास व पर्यावरणीय महत्त्व लक्षात घेता काही निसर्गप्रेमी आणि सामाजिक बांधिलकी असलेल्या युवकांनी याबाबत प्रशासनाकडे थेट लेखी तक्रार दाखल केली.
या तक्रारीमध्ये तलावाच्या जागेवर विविध खातेदारांनी केलेल्या बेकायदेशीर ताब्यांची माहिती देत प्रशासनाने तातडीने हस्तक्षेप करावा, अशी मागणी करण्यात आली होती.


तहसीलदारांचा आदेश: आधी मोजणी, मग कारवाई

तक्रार तपासून तहसीलदार, दौंड यांनी खालील गट क्रमांकांमध्ये तलावालगत अतिक्रमण झाल्याचे प्राथमिक स्वरूपात मान्य केले असून, संबंधितांवर कारवाईसाठी तलावाची मोजणी आवश्यक असल्याचे स्पष्ट केले आहे.

संबंधित गट क्रमांक खालीलप्रमाणे —
३४८, ३४९, ३५०, ३५२, ३५४, ३५५, १५०, १५४, १५८, १५९, १६०, १६७, १६८, १६९, १७०, १७१, १७२

तहसीलदारांनी पुढील आदेश दिले आहेत:

> “तलावाची जमीन आणि सीमारेषा स्पष्ट करण्यासाठी मोफत मोजणी तात्काळ करण्यात यावी. तसेच आवश्यक ७/१२ उतारे आणि मोजणी अर्ज उप-अधिक्षक भूमी अभिलेख कार्यालयात सादर करावेत.”


अतिक्रमण हटवण्याची शक्यता

मोजणी अहवाल प्राप्त झाल्यानंतर संबंधित अतिक्रमणकर्त्यांवर कायदेशीर कारवाई होण्याची पूर्ण शक्यता आहे. प्रशासनाने याबाबत गंभीर भूमिका घेतल्यामुळे तलावाच्या जतनासाठी हा निर्णय महत्त्वाचा टप्पा ठरणार आहे.

नागरिकांकडून स्वागत

स्थानिक नागरिक, पर्यावरणप्रेमी आणि युवकांनी तहसील प्रशासनाच्या या निर्णयाचे स्वागत केले असून, तलाव पुन्हा मूळ स्वरूपात येण्याची अपेक्षा व्यक्त केली आहे.

पुढील पाऊल:
– उप-अधिक्षक भू-अभिलेख कार्यालयात अर्ज दाखल
– अधिकृत मोजणी सुरू
– अहवालानुसार अतिक्रमण हटवण्याची प्रक्रिया

महाराष्ट्र पोलीस न्यूज 24
शोध सत्याचा, त्याला व्यवहाराची धार