नेताजी खराडे ( दौंड तालुका प्रतिनिधी )
केडगाव पाटबंधारे विभागाच्या शासकीय निवासस्थानात अवैध धंद्यांचा सुळसुळाट ; स्थानिक नागरिकांमध्ये संतापाचा उद्रेक
दौंड : केडगाव पाटबंधारे उपविभागाच्या शासकीय निवासस्थान परिसरात अवैध व बेकायदेशीर धंद्यांचे जाळे उभारले गेल्याचा धक्कादायक प्रकार उघडकीस आला आहे. सरकारी निवासस्थानांचा उद्देशच हरवून येथे गुन्हेगारी कृत्यांना अक्षरशः मुक्तद्वार मिळाल्याने परिसरातील नागरिकांत भीती व रोष दोन्ही वाढले आहेत.
उपविभागातील अनेक इमारतींना दुरुस्तीअभावी ओसाड रूप आले असून, हाच फायदा घेत असामाजिक मंडळींनी या जागेचा अड्डाच बनवला आहे. इमारतींमध्ये कचऱ्याचे ढीग, दारूच्या रिकाम्या बाटल्या, वापरलेली सामग्री, दुर्गंधी आणि संशयास्पद हालचाली — हे सगळे चित्र दिवसेंदिवस तीव्र होत आहे. रात्रीच्या वेळी येथे अनोळखी व्यक्तींची वाढती वर्दळ नागरिकांना भयभीत करणारी ठरत आहे.
स्थानिकांचा आरोप आहे की, निर्जन खोल्यांमध्ये रात्री दारूपार्ट्या, अड्डेबाजी व बेकायदेशीर धंदे खुलेपणे सुरू असतात. या अस्वच्छतेचा आणि असुरक्षिततेचा फटका परिसरातील कुटुंबांना बसत असून महिलांना व मुलांना सुरक्षितपणे फिरणे अवघड झाले आहे.
यातील गंभीर बाब म्हणजे पाटबंधारे विभागातील जबाबदार अधिकारी सिद्धार्थ शिवरे यांनी सर्व प्रकाराकडे सतत दुर्लक्ष केले, असा रोष नागरिक व्यक्त करत आहेत. निवासस्थानांची दुरावस्था, देखरेखीचा पूर्ण अभाव आणि बेकायदेशीर धंद्यांची वाढ — या सर्वांमुळे सरकारी जागा गुन्हेगारांसाठी मोकळे मैदान बनली आहे.
नागरिकांनी अनेक वेळा तक्रारी करूनही प्रशासन गाढ झोपेत असल्याची भावना निर्माण झाली आहे. त्यामुळे आता लोकांमध्ये तीव्र असंतोष असून, तातडीने कारवाई न झाल्यास मोठा आंदोलनात्मक पवित्रा घेण्याचा इशारा काही रहिवाशांनी दिला आहे.
स्थानिकांनी स्पष्ट मागणी केली आहे की, निवासस्थानांचे पुनर्वसन तातडीने करण्यात यावे, परिसरात सुरक्षा वाढवावी, स्वच्छतेची व्यवस्था सुधारावी, असामाजिक घटकांवर कठोर कारवाई करून परिसर मुक्त करावा.
सरकारी मालमत्तेचा होत असलेला उघड दुरुपयोग आणि प्रशासनाची भूमिका यामुळे निर्माण झालेले वातावरण धोकादायक बनले असून, जिल्हा प्रशासनाने तातडीने हस्तक्षेप करून हा प्रश्न मार्गी लावावा, अशी नागरिकांची ठाम भूमिका आहे.