नेताजी खराडे ( क्राईम रिपोर्टर )
मो.नं. : 70281 92140
पुणे जिल्ह्यातील दौंड तालुक्यातील केडगाव येथील प्राथमिक आरोग्य केंद्रात आयोजित करण्यात आलेल्या कुटुंब नियोजन शस्त्रक्रिया शिबिरादरम्यान एका महिलेचा मृत्यू झाल्याची गंभीर घटना समोर आली असून, या घटनेमुळे परिसरात मोठी खळबळ उडाली आहे. सरकारी आरोग्य व्यवस्थेतील निष्काळजीपणा आणि रुग्ण सुरक्षेच्या प्रश्नांवर पुन्हा एकदा प्रश्नचिन्ह निर्माण झाले आहे.
मिळालेल्या माहितीनुसार, केडगाव प्राथमिक आरोग्य केंद्रात कुटुंब नियोजन शस्त्रक्रियांसाठी विशेष शिबिर आयोजित करण्यात आले होते. शिबिरासाठी मोठ्या संख्येने महिला दाखल झाल्या होत्या. शस्त्रक्रियेच्या प्रक्रियेदरम्यान एका महिलेची प्रकृती अचानक खालावली. उपस्थित वैद्यकीय कर्मचाऱ्यांनी उपचार सुरू केले, मात्र उपचार सुरू असतानाच संबंधित महिलेचा मृत्यू झाल्याची माहिती समोर आली आहे.
या घटनेनंतर मृत महिलेच्या नातेवाईकांनी आरोग्य केंद्रात तीव्र संताप व्यक्त केला. “योग्य वैद्यकीय तपासणी झाली होती का?”, “ऑपरेशनपूर्व आवश्यक खबरदारी घेण्यात आली होती का?”, “आपत्कालीन परिस्थिती हाताळण्यासाठी आवश्यक सुविधा उपलब्ध होत्या का?” असे प्रश्न उपस्थित करत नागरिकांनी आरोग्य प्रशासनावर निष्काळजीपणाचे आरोप केले.
स्थानिक ग्रामस्थ आणि नातेवाईकांनी डॉक्टर नीलिमा आत्माराम लोखंडे यांच्या कामकाजावर गंभीर प्रश्न उपस्थित केले आहेत. पत्रकारांचे फोन न उचलणे, माहिती देण्यास टाळाटाळ करणे तसेच माध्यम प्रतिनिधींना ब्लॅकलिस्टमध्ये टाकल्याचा आरोपही काही पत्रकारांकडून करण्यात आला आहे. त्यामुळे या संपूर्ण प्रकरणात पारदर्शकतेचा अभाव असल्याची चर्चा सुरू झाली आहे.
घटनेनंतर केडगाव परिसरात तणावाचे वातावरण निर्माण झाले असून, दोषींवर कठोर कारवाई करण्याची मागणी जोर धरत आहे. “गरीब जनतेच्या जीवाशी खेळ करणाऱ्या अधिकाऱ्यांना संरक्षण देऊ नये,” अशी संतप्त प्रतिक्रिया नागरिकांनी व्यक्त केली. काही सामाजिक कार्यकर्त्यांनी या प्रकरणाची उच्चस्तरीय चौकशी करून संबंधित वैद्यकीय अधिकाऱ्यांवर गुन्हा दाखल करण्याची मागणी केली आहे.
दरम्यान, आरोग्य विभागाकडून या घटनेची प्राथमिक चौकशी सुरू करण्यात आल्याची माहिती मिळत आहे. चौकशी अहवालानंतरच मृत्यूचे नेमके कारण स्पष्ट होणार असले तरी, या घटनेने सरकारी रुग्णालयांमधील व्यवस्थापन आणि रुग्ण सुरक्षेच्या प्रश्नांकडे पुन्हा लक्ष वेधले आहे.
मृत महिलेच्या कुटुंबावर दुःखाचा डोंगर कोसळला असून, संपूर्ण दौंड तालुक्यात या घटनेची जोरदार चर्चा सुरू आहे. आता आरोग्य प्रशासन या प्रकरणात काय भूमिका घेते आणि दोषींवर कोणती कारवाई होते, याकडे सर्वांचे लक्ष लागले आहे.